Har Dharkan Haijaani Thi | Jaun Elia | Urdu Poetry


Har dharkan haijaani thi har khamoshi toofani thi Phir bhi mohabat sirf musalsal milne ki aasani thi Jis din us se baat hui thi us din bhi be kaif tha main Jis din us ka khat aaya hay us din bhi veerani thi Jab us ne mujhse yeh kaha tha ishq rafaqat hi to nahi Tab maine har shakhs ki soorat mushkil se pehchani thi Jis din woh milne aayi hay us din ki roodaad yeh hay Us ka blouse naranji tha us ki saarri dhaani thi Uljhan si hone lagti thi mujh ko aksar aur woh youn Mera mizaaj ishq tha shehri us ki wafa dehqaani thi Ab to us k baare main tum jo chaho woh keh daalo Woh angrayi mere kamre tak to barri roohani thi Naam pe hum qurbaan the us k laikin phir yeh taur hua Us ko dekh k ruk jana bhi sab se barri qurbani thi Mujh se bicharr kar bhi woh larki kitni khush khush rehti hay Us larki ne mujh se bicharr kar mar jane ki thaani thi Ishq ki haalat kuch bhi nahi thi baat barhane ka fun tha Lamhe lafaani thehre the qatroun ki tughyaani thi Jis ko khud maine bhi apni rooh ka irfaan samjha tha Woh to shayed mere piyase hontoun ki shaitaani thi Tha darbaar qalaan bhi us ka naubat khana us ka tha Thi mere dil ki jo raani amrohe ki raani thi

Leave a Reply

Your email address will not be published. Required fields are marked *